ኣብ ኤርትራ ዘሎ ሕቶ ሰብኣዊ-መሰል ኣብ ከመይ ዝበለ ኩነታት ይርከብ ከምዘሎ፡ ኣሽምባይዶ ንዓና ንኤርትራውያን ንህዝቢ ዓለም እውን ክሕብኦ ኣይክኣለን። ኣብ ኤርትራ ክብሪ-ሰብ ካብ ዝዋረድ፡ ነዊሕ ኮይኑዎ ኣሎ። ናይ ምዝራብ፣ ምጽሓፍ፣ ሓሳባትካ ናይ ምግላጽ መሰል ተሓሪሙዎ ዘሎ ህዝቢ ምዃኑ፡ ዓለም ብዓለሙ ይፈልጥዩ። ኣብዚ እዋናት እዚ ኤርትራ ብምግህስ ሰብኣዊ መሰል ኣብ ዝለዓለ ደረጃ ተሰሪዓ ትርከብ ኣላ።
ሰብኣዊ መሰላት ብሓይሊ ጠበንጃ ተረጊጹ ስለዝኾነ፡ ኣብ ኤርትራ ብዛዕባ መሰል ክዛረብ ዝደፍር የለን። ብዛዕባ መሰል ዝዛረብ ሰብ፡ ህይወቱ ዝቐበጸ እንተዘይኮነ፡ እቲ ዝኽተል ሳዕቤን ቀሊል ከምዘይኮነ ኣብ ተግባር ተራእዩ እዩ። ሕቶ መሰል ኣልዒሉኽ ደሓን ዝረኸበ መን ኣሎ? ገለ ኣብነታት ንምጥቃስ፡-
· ኣብቲ መጀመርታ ዓመተ ነጻነት፡ ሕቶ መሰል ዘልዓሉ ተጋደልቲ ነይሮም፡ እቲ ብመንግስቲ ህግደፍ ዝተዋህቦም መልሲ ግን፡ ማእሰርትን ስቓይን እዩ። ገለ ካብኣቶም ከኣ ክሳዕ ሕጂ ኣብ ቤት ማእሰርቲ ዓዲ- ዃላ ይርከቡ ኣለው። ሞይቶም እንተኾኑውን ዝፈልጥ የለን።
· ብድሕሪኦም ኣካለ ስንኩላን ተጋደልቲ ሕቶ መሰል ኣልዒሎም። እቲ መንግስቲ ከኣ ብጥይት መሊሱሎም። ብዙሓት ካብኣቶም ክሞቱ ከለው፡ ዝተረፍ ድማ ተኣሲሮም።
· ገለ ዓድታት ኣውራጃ ሓማሴን መሬትና ብዘይ ኣገባብ ተመንዚዑ ይውሰደና ኣሎ ኢሎም ተቓውሞ ኣልዒሎም። ከም እምባዶርሆን፣ ዓዲ ሶግዶን ዝኣመሰሉ። እቲ ዝተዋህቦም መልሲ ግና ናብ ናኹራ ወሲድካ ምቕያድ እዩ። ዓበይትን ነኣሽቱን ኣሰብኡትን ኣንስትን ብጸቢብ ተታሒዞም ስቓይ ከምዝተቐበሉ ይፍለጥ።
· ብግዲኦም ተመሃሮ ዩኒቨርሲቲ ኣስመራ፡ ኣንጻርቲ ጨፍላቒ ስርዓት ተቓውሞ ጌሮም። እቲ ዝረኸቡዎ መልሲ ግን፡ ኣብ ኣጻምእ በረኻ ዊዓን ገልዓሎን ተወሲዶም ከምዝሳቐዩን ከምዝሞቱን እዩ ተገይሩ።
· እቶም ብጉጀለ-15 ዝፍለጡ ላዕለዎት ኣካላት መንግስቲ፡ ቅዋም ሃገር ክትግበርን ህዝባዊ መንግስቲ ክትከል ዝብል ሕቶ ኣቕሪቦም። እቲ ንዝኾነ ሕቶ ክጻወር ዘይክእል መንግስቲ ግን፡ ከም ኣመሉ ብሓይልን ጐነጽን መልሲ ሂቡሉ። እቶም ኣብ ዝሓለፈ 30 ዓመታት ምእንቲ ነጻነት ተቓሊሶም ዝተዓወቱ ጀጋኑ ድማ፡ ብክሕደት ተኸሲሶም ይሃልው ይሙቱ ዝፍለጥ የለን።
· እተን ንህዝቢ ኤርትራ መቐረት ነጻነት ከስተማቕር ዕድል ሂበንኦ ዝነበራ ብሕታውያን ጋዜጣታት፡ ንድኽመት እቲ መንግስቲ ስለዘቓልዓ ከምዝዕጸዋ ተገይሩ። እቶም ጋዜጠኛታት ድማ ንልዕሊ ኣርባዕተ ዓመት ተኣሲሮም ይርከቡ ኣለው።
እዚ ኣብ ላዕሊ ተጠቒሱ ዘሎ ቁሩብ ንመዘኻኸሪ ደኣዩ ቀሪቡ ዘሎ እምበር፡ ኣብ ኤርትራ ዝተፈጸመ ምግሃስ ሰብኣዊ መሰል፡ ብኣፍ ተዛሪብካን ብኢድ ጽሒፍካን ዝውዳእ ኣይኮነን። እቲ ግህሰት ሰብኣዊ መሰል መዕገቲ ስለዝተሳእኖ ከኣ፡ ካብ 1991 ከምኡ ኢሉዩ ዝቕጽል ዘሎ። ወዮ ደኣ እቲ መንግስቲ ዘይምከርን ዘይሰምዕን ኮይኑ እምበር፡ ብዙሓት መንግስታት የኽፍኣልካ ኣሎ ኢለን ከመኽራ ፈቲነን እየን። ምኽሪ ዝቕበልን ዝሰምዕን ግን ኣይተረኽበን። ብኣንጻሩ እቲ መንግስቲ ቤት ማእሰርቲ ከግፍሕን ከብዝሕን እዩ ተጓዩ። እዚ ኽኣ እቲ መንግስቲ ኣብ ልዕሊ ህዝቡ ዘለዎ ንዕቀት ዘርኢ እዩ።
ብዙሕ ግዜ ብዛዕባተን ኣብ ኤርትራ ዘለዋ ቤት ማእሰርቲ ክጸሓፍ ጸኒሑ እዩ። ኣሰብኡትን ኣንስትን ከምዝቕጥቀጡን ከምዝሳቐዩን ተገሊጹ እዩ። እቲ ቤት ማእሰርትታት ቈጺርካ ዝውዳእ ኣይኮነን። ኣብ ኲሉ ኲርናዓት እታ ሃገር ኣብ ጐዳጉዲ ከይተረፈ ትሕቲ መሬት ኤርትራውይን ይእሰሩ ኣለው። ሰብ ኣፈራሪሕካን ኣሲርካን ዝፍታሕ ጸገም የለን። እቲ ዓቕሉ ዝጸበቦ መንግስቲ ግን፡ ንጥፍኣት ኣቢሉዩ ዝጉዓዝ ዘሎ።
ኣብ ኩለን ኣብተን ኣብ ኤርትራ ዝርከባ ቤት ማእሰርቲ፡ ዝፍጸም ግፍዕን ስቓይን ኣብዚ 21 ክፍለ ዘመን ይፍጸም እዩ ኢልካ ክትኣምኖ ዘጸግም እዩ። ብሕሱም ምቕጥቃጥን ኣብ ትሕቲ መሬት ምእሳርን ጥራይ ዘይኮነ፡ ክሳብ ኣጽፋርካ ብጉጤት ምሒኻ ምውጻእ ዝበጽሕ ስቓይ ኣሎ። ካብ ቤት ማእሰርቲ ንመርመራ ተባሂሎም ምስከዱ ዘይምለሱውን ብዙሓት እዮም።
ኣብ ቤት ማእሰርቲ ኤርትራ ሕክምና ንእሱራት ዝሕተት ነገር ኣይኮነን። መግቢ ንኽይትመውት ኢልካ ዝብላዕ እምበር፡ መግቢ ኣሎ ክበሃል ኣይከኣልን። እሱራት ብስድራቤቶም ክብጽሑ ስለዘይፍቀደሎም፡ ቅያር ክዳን ስኢኖም ብቁንጭን ትዃንን ቁማልን ተበሊዖምን ተሳቕዮምን እዮም። ክዳውንቶም ኣሪጉ ብርስሓት ጠቂሮም ዘይምሱል መሲሎም እዮም። ልዕሊ ኲሉ ከኣ ቤት ፍርዲ ዘይፈልጦም እሱራት እዮም። ብሕጊ ኣይፍለጡ ፋይል እውን የብሎምን።
ብጀካ እቶም ቅድሚ ሕጂ ኣስማቶም ጠቒስናዮም ዝነበርና እሱራት ካርሸሊ፡ ሕጂ ከኣ ናይ ካልኦት ካብ ኣስመራ ተላኢኹልና ኣሎ። ኣስማቶምድማ ካብዚ ኣስዒብና ነቕርቦ ኣሎና።
· ኣቶ ሓሰን ኬኪያ፡
ዕድሚኦም ልዕሊ 70 ዓመት፡ ብዘይ ዝኾነ ክሲ ንልዕሊ ኣርባዕተ ዓመት ኣብ ካርሸሊ ተኣሲሮም ነይሮም። ኣብ መፋርቕ መስከረም 2005፡ ኣብቲ ቤት ማእሰርቲ ዘሎ ሽቓቕ እኹል ብርሃን ስለዘይብሉን እቲ ዓይኖምውን ደኺሙ ስለዘሎ፡ ሸተት ኢሎም ብገጾም ስለዝወደቑ፡ ገጾም ብሕማቕ ተሃስዮም ኣብ ከቢድ ቃንዛ ይርከቡ ኔሮም። ኣብ ወርሒ ታሕሳስ 2005 ድማ ተፈቲሖም ተባሂሉ። እቲ ብስቅያት ዜጋታቱ ዝሕጐስ መንግስቲ ኤርትራ ግን ድሕሪ ሓሙሽተ ወርሒ መሊሹ ኣሲሩዎም ኣብዚ እዋን ኣብ ካርሸሊ ይርከቡ። እቲ ቀንዲ መእሰሪኦም ዝበሃል፡ ምስ ካልኦት ግዱሳት ዓበይቲ ብጾቶም ኮይኖም፡ ኣብ 2001 ንመንግስቲ ኤርትራን ነቶም ብጉጀለ 15 ዝፍለጡ፡ ነቐፍቱን ከቀራርቡ ስለዝፈተኑን ከምኡውን ቃለመጠየቕ ምስ ሓንቲ ካብተን ብሕቲ ጋዜጣታት ስለዝገበሩ እዩ ይበሃል።
ኣቶ ሓሰን ኬኪያ ኣብቲ ዝሓለፈ ጊዜ ደርጊ: ኣብ ሱዳን ከለው፡ ንኤርትራውያን የሕዋቶም ክሕግዙ ዘርኣይዎ ተገዳስነትን ዘወፈይዎ ሓገዝን ኩሉ ኤርትራዊ ክርስትያን ኮነ ኣስላማይ ይፈልጦ እዩ።
እቲ ፈታውን ጸላእን ዝፈልጦ ጽቡቅ ግብሮምን ለጋስ ኢዶምን ከኣ ብግፍዒ ክፍደይዎስ ግቡእ ኣይነበረን። እቲ ንዘኾለሶ ኢድ ምንካስ ዝልማዱ መንግስቲ ኤርትራ ግን፡ ንውዕለት ኣቶ ሓሰን ክዝክሮ እኳ ኣይደለየን። ኣቶ ሓሰን ኣቦ ዓሰርተ ኣርባዕተ ቆልዑ እዮም። ብሕማም ሽኮር፣ ብደም ብዝሒ፣ ብሕማም ዓይኒን ብሕማም ሕቖን ይሳቐዩ ኣለው።
· ኣስቴር ዮሃንስ፡ ኣብ ካርሸሊ ካሜራ 31 ንበይና ተኣሲራ ትርከብ። ምስ ሰብ ክትዛረብ ኮነ ክትራኽብ ዝፍቀደላ ኣይኮነን። ካብ ኣሜሪካ ምስተመልሰት ካብ ማዕርፎ ነፈርቲ ኣስመራ እያ ተጨውያ። ኣስቴር ብዓልቲ ቤቱ ንምኒስተር ጴጥሮስ ሰሎሙንን ኣደ ኣርባእተ ቆልዑን እያ። ብናፍቖት ደቃን ኲነታት ሰብኣያን ብዙሕ ስቓይ ኣሎዋ። በደለኛ እየ ኢልኪ ፈርሚ እሞ ክትወጺ ኢሎማ ከም ዝነበሩ ይንገር። ንሳግን ነጺጋቶ።
· ዓንደ መሓሪ መንክር፡
ኣብ ካርሸሊ ካሜራ 13 ካብ ዝእሰር ሰለስተ ዓመቱ ኣሕሊፍ እዩ። ኣብ ትካል ህግደፍ ሓላፊ ናይ ሊሎ ትራንስፖርቴሽን ካምፓኒ ነይሩ። መእሰሪኡ ስጋዕ ሕጂ ኣይተነገሮን።
· ተወልደመድህን ተስፋማርያም (ማኦ)፡
ቅድሚ ምእሳሩ ኣብ ኬንያ ኣብ ኤንባሲ ኤርትራ ከም ቀዳማይ ጸሓፊ ኮይኑ ተመዲቡ ይሰርሕ ኔሩ። ካብ ኬንያ እተው ተባሂሉ ምስ ኣተወ ካብ ማእርፎ ነፈርቲ ኣስመራ ቆሊቦም ኣብ ካርሸሊ ደርብዮሞ ይርከብ። ኣቦ ሰለስተ ቆልዑ እዩ።
· ሰሎሞን ሃብቶም፡
ተጋዳላይ እዩ። ወጻኢ ሃገር ከይዱ ከምዝተማህረ ይንገረሉ። ኣብ ቴሌኮሚኒኬሽን ሓደ ካብቶም ላዕለዎት ሓለፍቲ እዩ ነይሩ። ካብ ዝእሰር ልዕሊ ሰለስተ ዓመት ኮይኑዎ ኣሎ። ኣብ ካርሸሊ ካሜራ 5 ከኣ ይርከብ። ብብስጭት ብዝሒ ደም ገይሩሎ። ኣቦ ክልተ ቆልዑ እዩ።
· ተስፋይ ገብረማርያም፡
ኣብ ካርሸሊ ካሜራ 22 ተኣሲሩ ኣሎ። ወናኒ ብሉ ናይል ቤት-መግቢ እዩ። ብሕማም ሽኮር ብዙሕ ከምዝሳቐይን ኣብ ሕማቕ ኩነታት ከምዝርከብ ይንገር።
· ዮዲት ተስፋይ፡
ዕድሜኣ 21፡ ኣብ ካርሸሊ ካሜራ 6 ድማ ተኣሲራ ትርከብ። ብዙህ ከምዝተቐጥቀጠትን ብስምብራት መርኣይ ከምዘይብላ እቲ ዝበጽሓና ዜና ይሕብር። ንኽልተ ወርሒ ኣብ ጸልማት ሸላ ብፌሮ ተኣሲራ ንበይናያ ኣሕሊፋቶ። ዮዲት ሓንቲ ካብተን ብዙሓት ሕሰምን መከራን ዝቕበላ ዘለዋ ደቀንስትዮ እያ።
· ኮሎኔል ቴድሮስ ገብረእግዚኣብሄር (ትሪቫ)፡
ኣብቲ ደባይ ዝበሃል ክፋል ናይ ካርሸሊ፡ ኣብ ካሜራ 16 ተኣሲሩ ይርከብ። ብሕማም ሽኮር ብዙሕ ይሳቐ ከምዘሎ ይንገር። ኣቦ ሰለስተ ቆልዑ እዩ።
· ኣባ ደሳለይ መኣዛ፡
መንእሰይ መነኩሰ እዮም። ገዳሞም ማርያም ደብረ-ሲና እያ። ካብ ቅድሚ ክልተ ዓመት ተኣሲሮም ይርከቡ። ዓዶም ቈሓይን ሰረወታይ እዮም። ኣብ ትግራይ ከኣ ዓብዮም። ኣብ ትግራይ ምዕባዮምን ወዲቈሓይን ምዃኖምን ተደሚሩ ከኣ፡ ዝዛረቡዎ ትግርኛ ናይ ትግራይ ትግርኛ ከምዝመስል ገይሩዎ።በዚ ኽኣ ሰረወታይ እየ እንተበሉ ዝኣምኖም ስኢኖም፡ ትግራዋይ ኢኻ ኢሎም ኣሲሮሞም። ኣብ ካርሸሊ ካሜራ 4 ተኣሲሮም ምስነበሩ መሊሶም ኣብ ካሜራ 19 ንሸውዓተ ወርሒ ዝኣክል ንበይኖም ተኣሲሮም። ካብኡ ንካሜራ 8 ኣምጺኦም ምስ ሰብ ሓዊሶሞም። መሊሶም ድማ ናብ ሸላ ወሲዶም ብዘሰክሕ ኣቀጣቕጣ ኲሉ ኣካላቶም ጭፍልቕልቕ ኣቢሎሞም። ንኽልተ ወርሒ መመላእታ ድማ ኣብ ካሜራ 20 ኣብ ጸልማት ኣሲሮሞም። ብድሕሪኡ ናብ ካሜራ 4 መሊሶሞም። ኣባ ደሳለይ ገርሂን ሕያዋይን ስለዝኾኑ፡ እግዚኣብሄር ኣይርስዖምን እዩ።
· ቀሺ ገብረመድህን ገብረጊዮርጊስ፡
ናይ መካነ ህይወት መድሃኔ ኣለም ካህን እዮም፡ ብዕድመ ንእሽቶ ይኹኑ እምበር፡ ብክህነታዊ ሞይኦም ግን ብኽብሪ ዝጥመቱ ካህን እዮም። ኣብ ኦርቶዶክሳዊት ተዋህዶ ቤተ ክርስትያን ናይ ትምህርቲ ሰንበት ሓላፊ ኮይኖም ንነዊህ ዓመታት ኣገልጊሎም። ካብቶም ድሕሪ ነጻነት ንግብጺ ንዝለዓለ ትምህርቲ ዝተላእኩ ካህናት ምዃኖምውን ይፍለጥ። ኣብ ኣሜሪካን ኤውሮጳን ዝርከባ ቤተ ክርስትያናት ብምኽንያት ኣባ ማርቆስ (ኣባ መንግስቱ ኣበበ) ህውከት ምስ ኣተወንውን ምስቲ ብኣቡነ ያዕቆብ ዝተመርሓ ልኡኽ ቤተ ክርስትያን ተንቀሳቒሶም፡ ኣብቲ ኣማኒ ህዝቢ ምርግጋእ ኣብ ምምጻእ ኣበርክቶ ዝገበሩ ካህን እዮም። ሓያሎ እዋን እውን ንኣገልግሎት ወንጌል ንኣሜሪካ ዝተላእኩ፡ ቤተ ክርስትያን ተዋህዶ ኣፍሪያቶም ካብ ዝበሃሉ ዘመናውያንን ምዕቡላትን ካህናት ሓደ እዮም። ንከም ቀሺ ገብረመድህን ዝኣመሰሉ ስሑላት ካህናት ምእሳር ከኣ፡ ንጉዕዞ ኦርቶዶክሳዊት ቤተ ክርስትያን ዓጊትካ ደው ምባል ማለት እዩ። ቀሺ ገብረመድህን ኣቦ ሸውዓተ ንኣሽቱ ቆልዑ ምዃኖም ይፍለጥ። ኣባል ጊዜያዊ ሲኖዶስ ኮይኖምውን ካብኦም ዝድለ ኣገልግሎት ፈጺሞምዮም።
· መሪጌታ ይትባረክ በርሀ፡
ኣብ መንበረ ፓትርያርክ ዋና ጸሓፍን ኣዳላዊ ጋዜጣን ኮይኖም ዝሰርሑ ወዲ ቤተ ክርስታያን እዮም። ኣብዚ መወዳእታ ከኣ ኣማኸርቲ ብፁዕ ወቅዱስ እቡነ እንጦንዮስ ኮይኖም ካብ ዝሰርሑ ሰለስተ ሰባት ሓደ እዮም። ካብቶም ንፓትርያርክ ኣቡነ ኣንጦንዮስ ክርሕቁ ብመንገዲ ሃይማኖታዊ ጉዳያት መጠንቀቕታ ክግበረሎም ዝጸንሑ እዩም። መወዳእታኡውን እቲ ምስ ኣቡነ ኣንጦንዮስ ትዘራረቡዎ ጉዳይ፡ ናባና ሪፖርት ግበሩ ኢሉ ሃይማኖታዊ ጉዳያት ንዕኦምን ነቶም ክልተ ብጾቶምን ጸቕጢ ክገብረሎም ከምዝጸንሓ ይዝረብ እዩ። ኣብ መጠረስታውን ስርሕይ ብፍቓደይ ገዲፈየ ኢልካ ፈርም ተባሂሎም ተገዲዶም ከምዝፈረሙን ብድሕሪኡ ከኣ ካብ ወርሒ ሓምለ 2005 ጀሚሮም ኣብ ማሕዩር ይርከቡ። መሪጌታ ይትባረክ ኣቦ ሽድሽተ ቈልዑ እዮም።
· ዶክተር ቀሺ ፍጹም ገብረንጉስ፡
ኣብ ቤተ ክርስትያን ዝዓበዩ ሰብ እዮም። ቅድሚ ዶክተር ምዃኖም ኮነ ብድሕሪኡ ካብ ቤተ ክርስትያን ኣይተፈልዮን። መንእሰያት ተዋህዶ ብኣፍልጦ መጽሓፍ ቅዱስ ተሃኒጾም ክዓብዩ ዝብል ቅዱስ ቅንኣት ስለ ዝነበሮም ድማ፡ ነዚ ሓሳብዚ ግብራዊ ንምግባር ደኺመ ከይበሉ ክቃለሱ ምጽንሖም ይንገር። ኣብ ቤተ ክርስትያን መካነ ህይወት መድሃኔ ዓለም ከም ኣገልጋሊ ካህንን፡ ከም ጠርናፊ መንእሰያት ኮይኖም ዓቢይ ኣበርክቶ ዝገበሩ ካህን እዮም። ካብ ህዳር 2004 ኣብ ማሕዩር ይርከቡ። ኣቦ ሰለስተ ቆልዑ እዮም።
· ዶክተር ቀሺ ተኽለኣብ መንግስተኣብ፡
ካብ ጊዜ ንእስነቶም ጀሚሮም ኣብ ቤተ ክርስትያን መካነ ህይወት መድሃኔ ዓለም እዮም ዓብዮም። ኣብ ርእሲ ካህን ኮይኖም ምግልጋሎም፡ መንእሰያት ብኣፍልጦ ትምህርቲ ሃይማኖት ዝዓብዩሉ ጻዕሪ ካብ ዘካየዱ ክህናት ሓደ እዮም። ኣብ መጽሓፍ ቅዱስ ዘለዎም ኣፍልጦ ዕሙቕ ዝበለ ስለዝኾነ፡ ብስነ ጽሑፍ ብዙሕ ኣበርክቶ ከምዝገበሩ ይፍለጥ። ምዕብልትን ስልጥንትን ተዋህዶ ክርእዩ ካብ ዘለዎም ባህጊ፡ ናብርኦምን ሞያኦምን ብኻልኣይ ደረጃ ሰሪዖም፡ ንኣገልግሎት ወንጌል ተወፍዮም ክሰርሑዮም ጸኒሖም። እቶም ናይ ሃይማኖት ተዋህዶ ምዕባሌ ክርእዩ ዘይደልዩ ግና፡ ከምዝእሰሩ ጌሮሞም። ካብ ዝእሰሩ ድማ ካልኣይ ዓመቶም ኮይኑ። ኣብቲ ሓኪምን ሕክምናን ዘይርከቦ ቤት ማእሰርቲ ካርሸሊ ከኣ፡ ብሕማም ሽኮር ይሳቐዩ ከምዘለዎ እቲ ሓበሬታ ይገልጽ።
እቲ ግህሰት ሰብኣዊ መሰል ኣብ ክርስትያን ጥራይ ተሓጺሩ ዝተርፍ ኣይኮነን። ቁርዓን ንዝምህሩ ኣመንቲ ምስልምና እውን ኣረኻኺቡሎም እዩ። ንቈልዑት ቁርዓን ምምሃር ከም ገበን ተቘጺሩ ከኣ፡ ብዙሓት ኣብ ምምህርና ተዋፊሮም ዝጸንሑ ኣብ ትሕቲ ቀይዲ ኣትዮም ኣለው። ካብ ኣስመራ ዝተላእከለና ዜና ከምዝሕብሮ፡ እዞም ኣስማቶም ኣብ ታሕቲ ተጠቒሶም ዘለው ሰባት፡ ኣብ ገዛ ማንዳ ኣብ ዝርከብ መስጊድ ንቖልዑት ቁርዓን ይቐርዑን ነዴታት ድማ ሃይማኖታዊ ኣስተምህሮ ይህቡ ኔሮም። ኣብ ሞንጉኦምን ኣብ ሞንጐ ቤት ጽሕፈት ሙፍቲ ኤርትራ ብዘጋጠመ ምግርጫው ወይ ዘይምስምማዕ፡ መንግስቲ ድማ ኣብ ሞንጐ ብምእታው፡ ኮነ ኢሎም ነቲ ዝወሃብ ዝነበረ ኣስተምህሮን ንጥፈታትን ንከዳኽሙን ክዕንቅፍን ክብሉ ብዕለት 4 መስከረም 2004 ኣብ ቀይዲ ዝኣተው እዮም።
ኣቦ ሓሙሽተ ቈልዑ፡ ኣብ ኤምባሲ ጥልያን ከም ቴሌፎን ኦፕሬተር ን 32 ዓመት ዝሰርሑ፡ ኣባል ኮሚቴ ናይቲ ቤት ትምህርቲ ዝነበሩ።
ኣቦ ክልተ ቈልዑ፡ ስርሑ ነጋዳይ ወናኒ ድኳን። ኣባል ኮሚቴ ናይቲ ቤት ትምህርቲ እዩ። ብህማም ሽኮር ይሳቐ ከምዘሎ እቲ ሓበሬታ ይገልጽ።
20 ዓመት ዝዕድሜኣ መምህር ቁርዓን እያ።
23 ዓመት ዝዕድሜኣ ስራሓ መምህር ቁርዓን።
ዕድመ 19 ዓመት ስርሑ መምህር።
ዕድመ 22 ዓመት ስርሑ መምህር
ስርሑ መምህር ዕድመ 25 ዓመት
ስርሑ መምህር ዕድሚኡ 21 ዓመት
ስርሑ መምህር ዕድሚኡ 21ዓመት
ንልዕሊ ሓደ ዓመት ኣብ ካርሸሊ ተኣሲሮም ድሕሪ ምጽናሕ፡ ኣብ መስከረም 2005፡ ቤት ፍርዲ ከይከዱ ክሲ ከይተመስረተሎም እቲ ፍርዶም ኣብ ጸዕዳ ወረቐት ተጻሒፍ ተዋሂብዎም። ካብ ኣርባዕተ ስጋዕ ሓሙሽተ ዓመት ተፈሪዶም ድማ ካብ 2005 ኣትሒዞም ካብ ካርሸሊ ወሲዶም ኣበይ ከምዘእተውዎም ኣይፍለጥን።
መንግስቲ ኤርትራ ዝሓመመ እንተሓመመ፡ ዝሞተውን እንተሞተ ዝጠፍእውን እንተጠፍእ ዝግድሶ ኣይኮነን።
ኣተሓሕዛ ሰብኣዊ መሰላት ብዝምልከት፡ መንግስቲ ኤርትራ ጽቡቕ ዝና ከምዘይብሉ ሙሉእ ህዝቢ ዓለም ይፈልጥ እዩ። ዋላኳ ብዙሓት ንሰብኣዊ መሰላት ዝጣበቓ ማሕበራት ስክፍትእን ብዘይ ምቑራጽ እንተገለጻን ንመንግስቲ ኤርትራውን እቲ ምግሃስ መሰል ዜጋታቱ ጠጠው ንክብሎ እንተተማህጸናን፡ እቲ መንግስቲ ግን ብግምጥሊሽ ይርድኦ ግዲ ሓልዩ፡ መመሊሱዩ መሰል ዜጋታቱ ኣብ ምጥሓስን ምጭፍላቕን ዝርከብ ዘሎ።
ኤልሳ ጭሩም
ለንደን፡ ዓዲ እንግሊዝ
22 ግንቦት 2006
